بقلم : كريم مدحت

الريس اتنحي والثورة خلصت .. البلد فرحت بالثورة وانجازات الثورة .. العالم كله اتكلم عن مصر وشباب مصر .. العالم كله اتكلم عن عظمة ثورة شباب مصر .. لاول مرة الشباب دي تحس بالفخر لانهم عملوا انجاز قومي .. انجاز غير أن المنتخب خد كأس الامم الافريقية .. الشباب دي عرفت يعني ايه مصر .. يعني ايه بلدي .. يعني ايه اضحي عشانها .. يعني ايه ممكن اموت عشان خاطر بلدي .. يعني ايه اقف واقول لأ للظلم .. يعني ايه اقدر اعبر عن رأيي ... الي اخر هذا الكلام اللي هياخد مني ساعات اكلم فيه .. المهم اللي عايز اقوله دلوقتي ان الثورة خلصت .

بعد كدا الشباب اتفجر فيه طاقات ايجابية عمر ما حد كان يحلم ان الشباب دول .. او ان الجيل دا يكون جواه كم الايجابية دا .. شفنا شباب التحرير نفسهم نزلوا نضفوا الميدان تاني يوم بعد التنحي .. وعلي نهجهم انطلق معظم الشباب المصري بحملات تنظيف لشوارع مصر .. اللي نزل وشاف الحملات دي ..هيحس اد ايه الشباب دا عايز يخدم بلده .. اد ايه عايز يتغير ويغير كل اللي حواليه .. شوفنا الايجابية دي كمان في الشباب اللي نزلت بحملات توعية للشعب الغلبان اللي كان مضحوك عليه من وسائل الاعلام .. شفناها في الشباب اللي شاركت في موضوع محو الأمية  .. شفناها ولسه بنشوفها في الشباب اللي فكر وبيفكر يعمل جمعيات وأسر ومراكز وحملات تخدم مصر وتخدم شعبها بجد .. شفناها في الشباب اصحاب حملة ابدأ بنفسك اللي تقريبا وصلت لناس كتير وكانت بتكلم كل واحد انه يبدأ بنفسه وميرميش ورقة وميعاكسش وميدفعش رشوة وميغشش و.................................. الخ .

بعد كدا ابتدينا ندخل في دوامات .. دخلنا في دوامة الفريق احمد شفيق والوزارة بتعته .. طب نسيبه ولا منسيبوش .. طب نجيب مين بداله .. طب هو كويس ولا لأ .. طب هو أحسن ولا عصام شرف .. طب واشمعنا عصام شرف ..وفضلنا فترة في الدوامة دي .. لحد ما عصام شرف كسب المزاد وبقي هو رئيس الوزرا .

بعدها دخلنا في دوامة تانية اسمها أمن الدولة وهل يا تري نحله ولا لأ .. طب نغير اسمه ونخليه مهتم بالارهاب بس ولا نخليه مختص بالشئون الخارجية ولا نعيد هيكلته .. بعدها ابتدي يظهر علي الرأي العام كل يوم بلاوي جديدة لأمن الدولة وحبيب العادلي ... لحد ما خلصت دوامة أمن الدولة ودلوقتي هندخل في دوامة جديدة اسمها تعديل الدستور ويا تري هتقول نعم أم لا .

دا تقريبا ملخص اللي حصل في مصر خلال شهر بعد الثورة .. كل يومين يحصل تهييج للرأي العام في موضوع ما وينتهي بعدها بفترة .. والشعب الغلبان يفضل يلف في دايرة مبتخلصش .. كل ما يوصل لاخر نقطة في الطريق تكون هي نقطة البداية لدايرة ودوامة تانية .

فضلت انا كمان الف في الدوامات دي .. فضلت الف لحد ما نسيت اساسا انا بلف ليه .. حسيت ان في شباب كتير زيي .. فكرت اعمل حاجة مختلفة عشان اخرج برا الدوامة دي .. فكرت احلم .. احلم بــــــمصر .. احلم  ببلدنا .. احلم بالبلد دي بعد 10 سنين هيبقي ايه حالها .. عايز اشوفها ازاي بعد 10 سنين .. بدأت احلم بالمستقبل .. احلم بأي حاجة هتضيف للبلد مهما كانت بسيطة .. المهم اخرج برا الدوامات دي .

اول حاجة حلمت بيها ان بلدنا بعد 10 سنين متكنش من دول العالم التالت .. مش هقول تكون من اوائل الدول الاقتصادية وصاحبة الريادة في عجلات التنمية والتقدم ..بس علي الاقل تكون البلد اقتصاديا اتقدمت كتير .. نبتدي نشوف منتجات مصرية بتتصدر لدول خارجية غير تصدير الغاز لاسرائيل .. ان يتواجد لمصر كيان اقتصادي معترف به علي خريطة العالم .. علي الأقل ان تشغل مصر مكانها الطبيعي الذي يليق بها وبأبنائها .

حلمت ان بعد 10 سنين ان مصر تسدد ديونها العالمية .. ما انا مش هبقي مستريح غير لما نسدد الديون اللي البلد غرقانة فيها .. لان مفيش تقدم هيحصل ولا كيان اقتصادي هيتكون الا لما تسدد ديونك .. حلمت انه يكون في اكتفاء ذاتي بعد 10 سنين .. ميبقاش في عجز في الميزان التجاري .

حلمت ان الدولة  تبقي رائدة في البحث العلمي .. ان مصر يطلع منها علماء في كافة المجالات في كل انحاء العالم .. مش مجرد عالم كل كام سنة . لا عشرات ومئات العلماء والمخترعين والمكتشفين يطلعوا من مصر .. علماء يكتبوا اسم مصر في كل كتب ومراجع العالم .. يسجلوا في التاريخ ان مصر طلع منها علماء اضافوا للعلم وللعالم الكثير .. علماء نفخر بهم في كل مكان .

حلمت ان مصر تتقدم زراعيا .. حلمت ان الصحرا الصفرا دي اتحولت لارض زراعية ..و ان مصر مبقتش تستورد اي محاصيل من الخارج .. ان مصر ابتدت تصدر لدول العالم الخارجي الفائض الزراعي من عندها .

حلمت اني اشوف جملة ( صنع في مصر ) دي علي معظم المنتجات .. مش بقول معظم المنتجات في البلاد الاجنبية .. لا معظم المنتجات في مصر ذات نفسها .. حلمت ان عبارة صنع في الصين دي تختفي من مصر .. هل لك ان تتخيل ان فانوس رمضان مصر بتستورده من الصين .. طب ازاي .. دا مصر بتستورد من الصين حتي الاستيكه .. مش معقولة مفيش في مصر حد بيعرف يصنع استيكه .. هل يعقل .. لأ في طبعا .. بس الواقع المرير ان الصين بتصنعها وبتشحنها وتوردها للبلاد التانية بتكلفة اقل من تكلفة صنعها فقط في البلد ذات فسها .. ودا كله بسبب خطأ التخطيط الاداري ..عشان كدا حلمت ان يحصل تخطيط وتصنيع بطريقة صحيحة تخلينا نستغني عن استيراد اي حاجة وكل حاجة من الصين .

حلمت ببلد مفهاش زحمة .. حلمت بشوارع نضيفة .. حلمت بحرية الرأي .. حلمت باعلام نضيف .. حلمت بماتش اهلي وزمالك من غير شتيمة .. حلمت بعيد من غير واقعات تحرش ..  حلمت بمدارس وجامعات وطرق تعليم زي اوروبا والدول المتقدمة .

حلمت برئيس وبلد ووزارة مبتسرقش من البلد حاجة .. حلمت بمجتمع بيخاف علي بلده .. حلمت بحاجات كتيرة اوي سياسيا واقتصاديا وتجاويا وصناعيا وثقافيا وفنيا .. وحلمت بحاجات كتيرة اوي بسيطة .. المهم اني حلمت ولسه بحلم .

بقي ان اقول احلموا .. يا أطفال ويا شباب احلموا .. احلموا بمصر .. احلموا بالبلد .. يا شباب مصر أنتم الحاضر .. ويا اطفال مصر انتم المستقبل ..  احلموا ولتجعلوا من أحلامكم اهدافا باذلين كل الجهد من أجل تحقيقها ..

فلتتخيلوا مصرالان لوحة فنية .. لوحة قاتمة تمتلأ بالسواد والعتمة والظلام .. واحلامكم تلك هي التي ستزيل ذلك الظلام.. احلامكم هي شعاع النور الذي ينبثق وسط هذا الظلام معلنا رغبته في التغيير .. هي شعاع النور الذي سيكتب تاريخ مصر القادم .. فلا تبخلوا علي مصر بأحلامكم .