صباح الخير يا ريس امبارح ادليت علي المركز كنت رايح اشتري شوالين سماد من المدعم رحت لجيت الراجل بتاع الجمعية مش موجود.. مخابرش هو راح فين جلت اجعد استناه ع الجهوة لجيت واحده في التلافزيون بتجول كل سنة وانت طيب يا ريس سالت الواد صميدة بتاع الجهوة .. ريس مين جالي الريس بتاعنا عيد ميلاده بكرا جلتله دا الكام عاد جالي 82 ..ربنا يزيد ويبارك يا ريس جلت لازم اجولك كل سنة وانت طيب يا ريس بس كان عندي لك طلب شوال السماد بجي بخمسميت جنية يا ريس وانا علي جد حالي .. مخابرش هجيب منين كل غلة خمسميت جنية عشان اشتري السماد يا ريس دول بيجولوا عليه مدعم .. اني معارفش يعني ايه مدعم بس جالوا دا كدا راخيص .. امال لو مش رخيص
كل سنة وانت طيب يا ريس امبارح كنت قاعد مع الواد ابني (6 سنين) وبقوله دا عيد ميلاد الريس ال 82 قالي والريس دا بيشتغل ايه قلتله دا زي الحاكم او الخليفة كدا قالي ازاي مش اي حد بيعدي ال 60 بيطلع معاش وبيبطل شغل معلش يا ريس عشان خاطر فريدة يا ريس ما تاخد علي كلامه .. دا عيل صغير وميعرفش حاجة ميعرفش ان في ناس بيعدوا ال 60 بس بيشتغلوا عشان خبرتهم في المجال بتاعهم وابداعهم
ليا عندك كلمة تانية يا ريس النهاردة نزلت اجيب فطار زي اي بني ادم مش هقولك جبنة ولانشون وبتاع انا نزلت اجيب فول وطعمية جبت بجنية فول وجنية طعمية وجنية مخلل و ب2 جنية عيش يعني حوالي 5 جنية فطار وانا يا ريس مرتبي مفهوش خمسات كتير مش معقولة 150 جنية فطار بس يعني لو هافطر واتغذي واتعشي انا وولادي فول وطعمية محتاج 450 جنية وانا مرتبي 400 جنية بس دا غير اللبس والمدارس والدروس
لكن يا ريس لو الموضوع دا عكنن عليك في عيد ميلادك خلاص انا هاتصرف ...بلاش مخلل..او بلاها عشا خالص المهم تفضل مبسوط يا ريس
ازيك يا سيادة الريس مع اني زعلان منك يا ريس بس كل سنة وانت طيب انا تعبان يا ريس انا عندي 25 سنة يا ريس ولسه مخلص كلية طب .. لسه متخرج مبقاليش شهرين قال ايه يا ريس عايزين يلغولي تكليفي بقالي 8 سنين في طب متعلمتش ازاي ادي حقنة وكنت بصبر نفسي وباقول لما اتخرج هاتكلف واعرف البت داليا اللي في تمريض جنبنا .. كنت بقابلها في الكافيتريا كتير .. بتقولي متزعلش نفسك انا هاعلمك ازاي تدي حقنة بتاعت تمريض تعرف وانا لا..ينفع يعني وعايزين يلغولي تكليفي .. طب اشتغل ازاي يا ريس انا ما هو يا تدوني تكلييفي يا هاموت العيانين وبالمرة اقلل من تعداد السكان بس الواد محمود دا بيقول هيتخصص باطنة وانا علطول هاكشف عنده وهو كمان ملوش تكليف .. واخاف هو كمان يبقي بيموت العيانين ويموتني بقولك يا ريس لو هتلغي التكليف متلغيش تكليف الواد محمود
الواد ابني يا ريس اتخرج يا ريس ومش محوش غير 500 جنية وبصراحة عايز يتجوز انا هاسيبه يكلمك يا ريس تعبت يا ريس .. تلت اربع البنات في الشارع بقوا حلوين وكلهم بقوا شبه بعض الزي الرسمي بتاع معظم البنات دا ( البلارينة والتونيك والبدي والبنطلون المقفز دا ) بقي يخلي الواحد عايز يتجوز بحاول مبصش عليهم كتير .. بس هاضحك عليك واقولك مببصش خالص .. ازاي .. دول بقوا في كل حتة حتي لو مبصتش خالص التلفزيون يا ريس .. مبقاش ينفع خالص كدا كل حاجة في التلفزيون بقي يجبلك واحدة تقف تتنطط يمين وشمال برامج / اغاني / افلام حتي ماتش الكورة بقي يجبلك بنتين كدا يا ريس يمسكوا الورد لزمتهم ايه معرفش انا بقي عايز اتجوز
هاه يا ريس شفت الواد ابني بيقولي من ساعة ما شاف البت بوبي بتاعت اعلان ميلودي بتاع حمزاوي (اديني) وهو بيقولي اديني ..اديني فلوس يابا عشان اتجوز بصراحة عنده حق يا ريس .. الاعلام بقي فظيع اوي وانا مش عارف اديله منين يا ريس انا محوشله ست الاف جنية بس اقل شقة بقي ب 60 الف جنية فيا ريس يا تديني سلفة اشتريله الشقة..يا تقولهم يبطلوا يذيعوا الاعلان او قول لجمال مروان زي ما مشي بوبي يمشي البت السكرتيرة ويا ريت توصل لبوبي سلامي يا ريس بس من غير ما تقول لام العيال
صباح الخير يا ريس البت بهانة بنيتي بتقولي انها عايزة تجوز مهند قولتلها مهند مين .. قالتلي مهند التركي قمت ضاربها بالقلم .. افتكرته واحد في الكفر بتاعنا وبعد كدا عرفت انها قصدي علي مهند بتاع البت نور بتقولي انها بتبعتله رسايل علي النت (الله يلعن النت علي النتيتة علي اللي بينتتوه) يا ريت يا ريس متذيعوش المسلسلات دي عشان من ساعة ما شفت البت لميس وانا مش طايق الولية مرتي
ازيك يا ريس انا الواد صميدة صبي القهوجي اللي في اول الموضوع امبارح ادليت علي الغيط عشان اقابل الكيرل فردند بتعتي قابلت الواد حمدان ابن العمدة وهو متعلم برا الكفر بيدلي كل سنة علي مصر يتعلم هناك قلت هو اكيد فاهم في احوال البلد قلت احكيله علي الموضوع كله حكتهوله كله قالي في ناس بتقول ان الريس ملوش ذنب .. دا كويس .. بس الناس اللي حواليه هم اللي خاربين البلد بردو انا عاتب عليك يا ريس ما كنت تقولي ان في ناس تانية هي اللي مبوزة البلد كنت جبت الواد سعفان وحمدان وهريدي وكنا دشدشناهملك دش كل سنة وانت طيب يا ريس
كان معاك بالترتيب:
محمد عتريس الضبع ..فلاح مصري بسيط
محمود المهدي محمد .. موظف علي قد حاله
كريم سينا .. طالب في طب
حسن محمد .. المشهور بحسن خشبه .. نجار .. وابنه احمد ( مخلص حقوق )
منصور البدري .. عمدة الكفر .. طويل العمر يطول عمره ..هاي هيء
صميدة محمد غباشي .. صبي قهوجي
واي تشابه في الاسماء في الواقع فهو مقصود
اي خطأ في كتابة حروف الكلمات فهي مقصودة لانها علي لسان مواطن مصري بسيط
