بقلم : فداء الحبيب 
خدعوك فقالوا....لا شكر
على واجب
لا شكر على واجب...كلمة
توارثناها فى ثقافتنا ولكن لو جينا سوا كدة نفكر فيها بتعمق شوية
لا هنا نوعها...لا
النافية للجنس...بمعنى انها بتنفى الحكم شاملا عن جنس اسمها...زى كدة ربنا سبحانة
وتعالى لما يقول (لا اكراة فى الدين)
وعشان منقلبش حصة
نحو...ببساطة كدة الكلمة دى معناها
ان اللى يعمل واجبة لا
يستحق علية الشكر
وبينى وبينكوا انا مش
عارفة لحد دلوقتى اية الحاجة الكويسة اللى اعملها وتكون مش من وجباتى...المفروض ان
انا مواطنة ايجابية هنا....لما اذاكر...او اساعد اللى حواليا...لما اساعد حد
معرفوش انة يعدى الطريق....لما اشيل ورقة من الطريق...كل دى واجبات بتفرضها عليا
انسانيتى...وبالتالى مينفعش حد يشكرنى عليها
بس احنا هنا...ف القرن
الواحد والعشرين....لاقينا اننا بنفهم اكتر من سيبوبة وامثالة...وخلينا لا النافية
للجنس تنفى نفسها اصلا
فانفجرت منا انهار
وشلالات من الشكر بطريقة مستفزة
نشكر رئيس الحى الفلانى
على قيامة بتمهيد الطريق...كما نتقدم بخالص الشكر والعرفان بالجميل للسيد الوزير
لقيامة بدورة تفقدية للمصالح التابعة لوزارتة...وشكر كبير من الحجم الجامبو
لفخامتة لقيامة بالتدخل لحل مشكلة اهالى القرية الفلانية...وجزيل الشكر لذلك
الطبيب الذى يحضر مسرعا عندما تتواجد حالات طارئة..
شكر عمال على بطال..ليل
ويا نهار...لحد ما الشكر فقد قيمتة الحقيقة
كأن الطبيعى اننا ننام
نأنتخ....ولما ربنا يسهلها ونعمل واجباتا تتكتب فينا معلقات من الفخر والشكر
والعرفان بالجميل...
لا أنكر ان الشكر شيئ
جميل وبيدل ع الذوق...لكن بالشكل دة...المبالغة ف الشكر بتوجة رسالة مغلوطة تماما...
والمشكلة فيمن يتلقى
هذا الشكر...مع كل هذا الكم من التشكرات بيخيل الية انة جاب الديب من ديلة وانة حد
مجابتوش ولادة..وبعدين بقى هو ومزاجة...انا بقالى كتير محدش قالى شكرا..خلاص يبقى
انزل اشتغل....انا زهقت من كمية الشكر ...خلاص ارتاح شوية من الشغل والتشكرات
نقطة ضوء كلنا لازم
ناخد بالنا منها....واجبك دة شيئ مفروض عليك...لو معملتوش هتتعاقب وعقابك هيكون
اكبر من عدم تدشين قصيدة فى شكرك....عقابك هيتوازى مع عدد المصالح اللى اتعطلت
باهمالك لواجبك...اما لو عملت واجبك...فانت حد أمين على واجبك...وتترقى وتاخد
واجبات اكتر....لكن اللى بنشوفة اليومين دول من نوعية (نشكر سيادتك على انك يا
حراااام صحيت من النوم وجيت شغلك وما شاء الله عليك طلبت قهوة وحليت الكلمات المتقاطعة
ومشكورا مشكورا جدااا مشيت بعض المصالح) دة مهزلة!!!
نستحق جميعنا ان
تحاكمنا عليها فضيلة الشكر بتهمة اهدار الشكر العام .
| 