بقلم كريم مدحت

من حوالي شهرين كدا سألني واحد صاحبي هتنتخب مين ؟ فقولتله انتخب !!! .. انتخب مين .. انت بتهزر .. واحنا من امتي بننتخب في اي حاجة .. قالي انتخابات الرياسة الجاية .. تنحت كدا شوية وقلتله هو في انتخابات للرياسة .. ما سيادة الريس بياخدها كل سنة باكتساح .. قالي ما هو الريس ملوش فترات تجديد تانية .. المفروض ان احنا هننتخب ريس جديد .. فكرت كدا شوية وعجبني الموضوع وطلعت في دماغي اني انتخب .. لاول مرة في حياتي هانتخب حد .. وبعدين مش هانتخب اي حد .. دا انا هانتخب ريس للبلد .

سالته هو مين اللي مرشح نفسه .. قالي في البرادعي وغالبا جمال مبارك كمان هيرشح نفسه

فكرت مين فيهم انسب للمنصب دا .. بصراحة احترت .. معرفتش انتخب مين .. قررت استني لحد ما الانتخابات تبتدي وابقي اشوف هاعمل ايه

ابتديت اتابع في الاعلام اخبار الانتخابات والحملة اللي كان عاملها البرادعي وقعاده مع الناس في الشوارع وكلامه معاهم ..... الخ

ساعتها الموضوع عمل ضجة اعلامية كبيرة .. حتي لما سافرت اسكندرية لقيت هناك تجمعات جماهيرية كبيرة لتأييد البرادعي

حسيت ان الموضوع بجد وان مصر هيبقي فيها انتخابات بجد ومنافسة بجد .. فضلت الحملة حوالي اسبوعين عاملة نفس الضجة تقريبا .

بعد الاسبوعين قابلت صاحبي تاني وسالته ايه اخبار الانتخابات .. هتنتخب مين ؟ قالي انتخابات ايه؟ قلتله بذهول انتخابات الرياسة ؟ قالي انت مش عايش في الدنيا ولا ايه ؟ انتخابات ايه وبتاع ايه؟دي البلد مقلوبة عشان قضية كاميليا شحاته (عذرا لو في غلط في الاسم .. بصراحة مش فاكر ) قلتله مين دي ؟ قالي دي واحدة مسيحية اسلمت وهي مخطوفة دلوقتي وطلعوا دوبلير ليها ع النت تقول انها كاميليا بس احنا عرفنا انها مش كاميليا الحقيقية .. قلتله انت بتصدق كلام الجرايد الصفرا دي وبعدين مش مهم دلوقتي .. المهم انتخابات الرياسة والبلد والمستقبل. بصلي بقرف كدا وقالي هو انت مش مسلم ولا ايه ؟ قلتله مسلم بس انا هاعملها ايه دلوقتي ؟ مشي وسابني ولسان حاله بيقول ( كافر) ..- اه.. انا يعني.. كافر-

تاني يوم شفت صاحبي دا واقف في تجمع جماهيري مع بعض زمايلنا ورافعين يافطات مكتوب عليها (رجعولنا كاميليا يا ....... ) .. وبالصدفة البحتة كانوا هم هم الناس اللي موجودين في التجمع الجماهيري اللي كان من اسبوعين لتأييد حملة البرادعي ..قلت لنفسي  دا الموضوع بجد بقي وانا فعلا مش عايش في الدنيا .. رحت اشوفهم وافهم الموضوع بالتفصيل .. رحت سألت واحد ايه الحكاية .. حكهالي .. قلتله واللي انتو بتعملوه دا لزمته ايه ؟ قالي عشان نرجع كاميليا.. قلتله بس دا شغل الامن وبعدين هي لو اسلمت فعلا وحد خاطفها .. ذنب الناس المسيحين ايه انكم تشتموهم ؟ ... لو مفيش مفر من الشتيمة .. اشتموا الشخص اللي خطفها بس.. ومهما كان دا احنا وهم بيجمعنا وطن واحد وملناش غير بعض في الاخر ... (وانا كنت بتكلم ببراءه وصدق متناهيين ) . طبعا هو كتر خيره ساعتها انه شتمني بس من غير ما يمد ايده عليا .

عدا اسبوعين كمان .. قابلت صاحبي دا تالت مرة ..  قلت الم الدور بقي واكلمه براحة .. فقلتله ايه اخبار قضية كاميليا ؟ قالي كاميليلا مين ؟ قلتله كاميليا شحاته !!! رجعتوها ولا لسه ؟ قالي مش عارف .. مش فاكر اساسا .. هو انت مش عايش ولا ايه .. دي البلد مقلوبة عشان الحادثة اللي حصلت في الدائري امبارح وطالعين دلوقتي التجمهر اللي ادام وزارة النقل عشان نطالب بعقاب المسئول عن الاهمال الجسيم دا ..

طب يا عم انت الانتخابات ؟ قالي بلا انتخابات بلا بتاع

واتكرر نفس الموقف مرارا وتكرارا .. اخرها التجمهر اللي كان ادام  وزارة الداخلية للمطالبة بمعاقبة المسئولين عن الشغب في ماتش الاهلي والترجي ..

وكانوا نفس الاشخاص بتوع كل تجمهر وفي الاخر لما تسألهم ايه اللي حصل بعد التجمهر.. يقولك مش مهم .. المهم ان احنا اتجمهرنا وخلاص

اخر مرة قابلت فيها صاحبي زي ما بيقولوا كدا ( كان قد طفح الكيل ) وقلتله : يا بني انت مبتفهمش ؟ مفيش دماغ خالص ؟ مش واخد بالك من اللي بيحصل ؟ مش شايف اللي حواليك ؟

مش واخد بالك ان في حاجة اسمها تغطية اعلامية .. قالي يعني ايه .

قلتله تغطية اعلاميه .. تعتيم اعلامي .. اعلام موجه كلها مصطلحات لعملية الدوامات اللي بتعملهالنا الحكومة !!

وهي احد سياسات الدولة للتعامل مع الشعب .

الحكومة بتمشيك زي ما هي عايزه من غير ما تيجي جنبك .. وانت عبارة عن شخص منوم مغناطيسيا بينفذ دوره بحذافيره زي ما هو مطلوب منه .

زمان الحكومة كانت لما تحب تجبر الشعب ع حاجة .. كانت بتستخدم العنف والسلاح . بس دلوقتي بيستخدموا سلاح اكثر قوة واكثر خطورة ا اسمه الاعلام.

تيجي الحكومة تقوم عاملة focus  علي قضية معينة عن طريق الاعلام والناس الغلابة هتقوم ببقية التمثيلية لوحدها وتستخدم سلاح الاعلام ضد نفسها.

لو الحكومة قابلت اي خطر حقيقي .. مبتعملش حاجة غير انها تثير قضية ما اعلاميا وعن طريقها تتحكم  في افراد الشعب كقطع الشطرنج التي تقوم بدورها علي اكمل وجه .

وللاسف وقتها تتحرك الجماهير وهي مقتنعة تمام الاقتناع انها تسير في الاتجاه السليم لمصلحة البلد.

جميل جدا انك تطالب بحقك ..  بس تقدر تقولي فين كاميليا شحاته دي دلوقتي ؟ وهل اسلمت بجد ؟ وهل كانت مخطوفة بجد ؟ وهلي هي شخصية حقيقية ام انها مجرد شخصية خيالية من وهم الحكومة ؟

تقدر تقولي فين الشباب بتوع تونس اللي كسروا الاستاد ؟ وهل خدوا عقابهم ولا لأ لما اترحلوا ؟

طبعا متعرفش

تقدر تقولي المسئول عن الحادثة خد عقابه ولا لأ ؟ ولا تحب اقولك كام حادثة حصلت بنفس المنظر دا من ساعتها ؟

"في المشمش يا برادعي" هو شعار اتخدته جميع وسائل الاعلام الموجه ( اللي هو تقريبا كل الاعلام) للقضاء علي حملة البرادعي وغيره ممن يشكلون خطرا علي الحكومة ما بين اثاره للفتنة الطائفية بين ابناء الوطن الواحد وما بين اثاره الفتنة بين شعوب دول العالم العربي وما بين وما بين .................الخ

اسمحوا لي ان اصف هذا النوع من الاعلام بالفيروس الذي يسيطر علي عقول الافراد البسيطة في الشعب والتي تمثل غالبيته جاعلة اياهم غير قادرين علي رؤية الحقيقة الكاملة والاندفاع وراء عواطفهم المتأثرة بهذا الاعلام الفاسد .

" في المشمش يا برادعي " هي رسالة اوجها اليك يا برادعي سواء كنت جدير بالرياسة ام لا

فإن كنت جديرا بها ينبغي عليك ان تقتل راس الافعي اولا .. يجب عليك القضاء علي هذا الفكر الاعلامي الفاشل..ودا في المشمش

اما اذا كنت غير جديرا بها اسمح لي ان اقول لك ( تعيش وتاخد غيرها يا برادعي .. ملكش نصيب في التورتة ) او برواية اخري ( المشرحة مش ناقصة قتلة)

احب ان انوه اني لست مع البرادعي او ضده ولست مع جمال مبارك او ضده .. بل انا ضد الاعلام الموجه .. ضد سذاجة هذا الشعب والذي اراه يتحرك كمن فقد وعيه .. ضد هذه السذاجة التي اصبحت تصيب حتي المثقفين من ابناء البلد.

كلنا نتذكر كم ثارت جميع طوائف الشعب ضد الجزائر الشقيقة ( نعم الشقيقة سواء شئنا ام ابينا .. فانت لا تختار اشقائك ) في العام المنصرم من اجل مبارة كرة قدم .. واكتشفنا بعد ذلك ان كل ذلك لم يكن الا خدعة من خدعات الاعلام  ولكن بعد فوات الاوان..فقد كنا نسب ونلعن في الجزائريين في حين كانت الحكومة تبرم احد اكبر الصفقات مع اسرائيل لتصدير الغاز برخص التراب ( اللي هو بنرجع نستورده تاني منهم باضعاف اضعاف التمن ).

ولا استبعد ان تكون حملة البرادعي ذات نفسها عبارة عن جزء من التغطية الاعلامية لما هو اكثر خطورة علي مستقبل البلد من الانتخابات .

واخيرا يتبقي لي ان اخبركم برأيي في الانتخابات والذي كنت قد ارجأته في اول الموضوع  : انا بقول ان احنا نغير كام مادة في الدستور ونجدد للريس تاني واهو اللي نعرفه احسن من اللي منعرفوش .