بيقولك كان في زمان راجل إسمه حنين جزماتي .. و لأن موضوع الجزم ده مكنش أساسي عند العرب كان نادر أوي .. و كان الجزماتي الشاطر بيتعرف أوي .. يعني كان اللي يشوفك لابس خف جامد يقولك ماركته إيه تقوله ده خف خزاعة مثلاً .. المهم يا سيدي كان في راجل عايز يشتري خف من جزماتي إسمه حنين و جاب فلوسه و أخد الجمل و سافرله بلاد و وديان و بلاد و وديان و بلاد و وديان لغاية ما وصله
الراجل : صباح الخير يا حج
حنين : صباح الخير يا عم أومرني
الراجل : يا سيدي الأمر لله كنت عايز خف ماركة إسود لميع
حنين : بس كدة .. هات رجلك
( و أخد حنين مقاس رجل الراجل بالمللي )
حنين : يللا فوت علينا بكرة
الراجل : إيه يا عم هو إنتا هتخترع الخف ده إنتا حيالله هتفصله
حنين : مكنش يبقى ماركة لو كان كلشنكان يا ابني
الراجل : يا عم ده انا جايلك من أخر الدنيا ده أنا معدي ييجي 3 بلاد و وديان علشان أجيلك
حنين : ما باليد حيلة يا عمنا
الراجل : ماشي يا حج
( تاني يوم )
الراجل : صباح الخير يا حج
حنين : أومر يا سيدي
الراجل : أنا بتاع البلاد و الوديان بتاع إمبارح عايز الخف الإسود اللميع بتاعي
حنين : ثواني هجيبهولك من الورشة ورا
الراجل : خد وقتك يا حج
(بعد ييجي 5 دقايق )
حنين : إتفضل يا سيدي و لمعتهولك و زي الفل أهو
الراجل : متفقناش عالتمن يا حج
حنين : بس 50 دينار
الراجل : تيت
حنين : ما هو ماركة يا سيدي
الراجل : بس 50 دينار كتير ده أنا مش هعرف أرجع بلدنا كدة
حنين : و ربنا إنتا صعبت عليا بص أنا مش هحسبلك مصنعية و هاخد منك 48 بس
الراجل : تيت تاني
حنين : لأ ده إنتا راجل هزأ بقى و بتشتم هتاخد الخف بالزوق و لا أنده عالشباب
الراجل : لا يا عم يفتح الله ده أنا أروح لأديدس أرخص
حنين : خلي أديدس تنفعك و لعلمك بس إحنا في الجاهلية يعني أديدس لسة مفتحتش حتى
الراجل : تباً لك
( و أخذ الناقة و شرخ )
طبعاً حنين إتعصب قوي من الراجل اللي تعبه و خلاه يعمل خف ماركة عمولة مخصوص و ميدفعلهوش و لا ميلم و كمان غلط فيه فحب يعمل فيه مقلب .. حنين عرف من بعض مصادره إن الراجل هيطلع عالصحراوي فخد الناقة بتاعته و سبق الراجل و رمى فردة من الخف و طلع ييجي كيلو قدام و رمى الفردة التانية و إستخبى ورا تلة رمل
الراجل وصل عند مكان الفردة الأولى نزل يشوفها
الراجل : يا دين النبي دي فردة خف إسود لميع زي بتاعة حنين .. يااه لو التانية هنا
( يا دوب مشي كيلو لقدام لقى الفردة التانية )
الراجل : أووبااا الفردة التانية ده أنا أرجع أجيب الأولى
( بس إفتكر إنه عالصحراوي و أقرب مخرج لسة ياما عليه )
الراجل : أنا أنزل أخدها جري و أربط الجمل هنا في أي حتة و أروح أجيب الفردة التانية
راح حنين طلع من ورا التلة و فك الجمل و خده و رجع بيه على محله و الراجل بعد ما رجع بالخف ملقاش الجمل قعد يلطم شوية و روح بلدهم في ميكروباص .. الناس لما تسأله فين الجمل يقولهم ما أنا جبت خفين حنين و الناس خدته سلاوة و حكاية
و من ساعتها أي حد يرجع خايب الرجا يقولوا " رجع بخفي حنين "
