الرئيسية » 2011 » فبراير » 19 » بيان مريسة
|
" بالصلاة ع النبي كده أنا جمعتكم النهاردة بعد الغاغة اللي عملتوهالي وصدعتوا أمي بيها الايام اللي فاتت دي بالرغم انكوا عارفين اننا دخلين على تصفيات امم افريقيا ومحتاجين نركز عشان الكاس الإفريقية الرابعة ع التوازي بقيادة أبو كريم ! ماعلينا .. بصوا بقى أنا مش هاطول عليكو وهاجيكو دوغري :
- تنحي : ربنا يديكوا ويدبنا طولة العمر !
- طوارئ : موعدكوش .. دي تقاليد وأعراف متوارث عليها ..
- رفع الحد الأدنى للأجور : القناعة كنز لا يفنى .. واللقمة الهنية تكفي مية !
- الفساد : أنا شايف ان ده أهم مطلب يا خايبيبن , مش تنحي وطوارئ وكلام فاضي
شكلكوا مش مقتنعين !!
لأ أقنعكوا .. ده أنا خبرة 30 سنة , والقرعة دي مش من فراغ !
تنحي : مش هتلاقوا أحسن مني ( يرفع ) مستوى الفرد والبلد .. اشتري مني
طوارئ : طول مانت ماشي سليم وعدل وف حالك .. تحتار الحكومة فيك
أجور : هنصيع على بعض , ماحنا فاهمين التيته , محدش بيعيش بوظيفة واحدة .. المدرس مثلا مدرسة الصبح , مجاميع بعد الظهر , دروس بالليل .. ده غير فلوس الملازم وال" تنصيص " مع سناتر الدروس ال" متخصصية " .. وبعدين الرزق بيحب الخفية .. واسعى يا عبد وانا اسعى معاك .. احسن متعيشلي بروتة ف البلد وتربيلي ف كروش
نيجي للفساد : بصراحة بقالي فترة بادرس حال البلد .. وعارف ان الشعب تعبان وان مفيش ولا مجال عدل اذا كان صحة ولا اسكان ولا بيئة ولا , ولا , ولا ..
بعد فحص وتمحيص يا حبايبي عرفت ان الحكومة مش على قد المسؤولية وفيها تجاوزات بالعبيط .. عشان كده انا مش هاكون خجلان واشيل وزير ولا اتنين .. واضحك عليكوا واقولكوا المرحلة الجاية هتبقى احسن
لا أنا عارف ان هما دول أس الفساد .. ولا تقلقوا , ده انتو شعبي حبيبي هو انا لي كام شعب يعني ؟!
ولذا قررت : إقالة الحكومة الفاسدة المتآمرة على النظام , نظرا لفسادها المتفشي .. وبعون الله هنعين ناس زي الفل هيكونوا على قد مسؤولية الحفاظ على شؤون المواطن اللي هو البلد اللي بدوره هيحط البلد ف عينيه , ولا إيه ؟!
أظن عداني العيب وأزح ونط السور ....
سامع واحد بيلسن مع اللي جنبه وبيقول : ده ناوي يحط ابنه ف السلطة من بعده !
لا يا بو لسان طوييييييييل !! لا يا بو لسان طوييييييييل !! مابنعملش أحزاب لمصالح شخصية , وبعدين جيمي طموحه أكبر من كده بكتير ! رئاسة إيه وبتاع ايه .. ده انا حتة زهقت بيني وبينكو وخير الله هم اجعله خير جالي هاجس اني استريح بقى , لكن نقول ايه .. ده حال القادة العظام ومصر قبل أي شئ , يلا تقعدوا بالعافية - بوسة - "
---
ده مش تحشيش رسمي !!!
ده أنا بتخيل لو ان الرئيس حاول يتكلم للشعب بالعامية بدل استخدام اللغة العربية اللي مليانة مصطلحات وتعبيرات لو اجتمعت على بعض :
- لجابت مليون معنى ف بطنها
- ببساطة تلت الشعب هيفهها وناس هتفتي ف اللي مش فاهماه وناس أميين هتفتح بقها طول ماهي بتسمع وهتقول ربنا يخليك اهم حاجة انك موجود واللي تعرفه احسن م اللي منعرفوش وأهم حاجة ان احنا عايشين وراضيين بالفتات , وربنا يعينك وتظبطنا اكتر من انت " ظابطنا "
- سهل فبركتها وممن تقعد تتكلم وتستطرد وترص مواد دستور بالعبيط
احترم الراجل اللي يجيلي Direct من غير تزويق كلام
هاستفيد إيه من تورتة مزتانة بأحلى الفواكه وأطيبها وهي من الأساس كعكة فاسدة !
م الاخر : الشعب عايز الزتونة ياريس ..
هاتها م الاخر ع البلاطة كده ..وقولها أنا الحكومة وباقي على قلبكو . مش - لم أنتوي !! - و - ولايتي " الحالية " !! - والكلام اللي بمليون سكة ده , عشان احنا اتكحرتنا ف عهدك كتير ومبروم على مبروم ما يرولش .. فأنت طيلة ثلاثون عاما لا ولم ولن تفهمنا يا برينجي
- ربنا ( يعينك ) قادر يا كريم ..
م م م " مـ واطن - ـصري - ـستقل "
|
|
مشاهده: 373 |
أضاف: vitsh
| الترتيب: 0.0/0 |
|
|
